Langit mandangka mulia Allah Taala

 

Langit mandangka mulia Allah Taala.  

Langit ngayangka enggau nyata utai t udah dikereja Iya. 

Masmur 19:1

Anang Irauka Utai

  Anang irauka utai, tang dalam semua utai, bantaika semua peminta kita ngagai Allah Taala ngena sampi, sampi peminta, enggau sampi terima kasih. Lalu pemaik Allah Taala, ti ngelui peragam mensia, deka nyaga ati enggau runding kita dalam Jesus Kristus.  Pilipi 4:6-7

Tiga bengkah pekara nyata ba ayat dua iti tu:

• Anang irauka sebarang utai.
• Bai semua utai tu ngena jalai sampi ngagai Allah Taala.
• Lalu pemaik Allah Taala ti enda ulih disagam kitai deka nyaga ati enggau runding kitai.

Pemaik ti disemayaka Allah Taala ke kitai iya pemaik ti ngelui peragam mensia - reti nya tadi kitai enda ulih terundingka pemesai enggau penalam pemaik ti deka diasai kitai- pemaik ti mengkang taja utai ti ngelingi kitai ukai ti tau ngasuh kitai nyamai tauka senang.

Nitihka ayat dua iti ke diperatika kitai ditu iya nya, kitai bulih pemaik tu lebuh kitai mantai segala utai ti ngasuh kitai irau tauka ngasuh kitai tusah ati ngagai Iya dalam sampi.  Kitai besampi ngena sampi pinta, ke sebarang utai ti dipeguna kitai, enggau besampi meri terima kasih ke utai ti udah diterima kitai enggau ke utai ti deka diterima kitai.

Udah nya nitihka disemaya, kitai deka bulih pemaik - pemaik ti ngasuh ati enggau runding kitai badu agi irau laban kitai udah nyerah semua utai nya dalam nama Jesus Kristus.  

Enti kitai ngasaika ati kitai agi irau taja kitai udah besampi nyerahka semua utai ngagai Allah Taala, kitai patut nanya diri.  Amat kini kitai udah ngelengka sereta nyerahka utai ti ngirau kitai nya tadi ngagai Allah Taala?  Amat kini kitai arap Allah Taala deka nyaut sampi kitai?  Amat kini kitai arap kitai deka bulih pemaik ti disemaya?  Nesal ati sereta minta ampun ari Allah Taala kategal pengarap kitai ti agi mekang.

Besampi kitai:

Apai kami di serega, kami ngaku kami orang ti agi deka ngereja utai nitihka peneka ati enggau pengering diri empu.  Ampun kami ti agi kakang ati.  Keringka pengarap kami ngambika enggau ati ti ngasi, kami ngelengka semua utai ti ngasuh ati kami irau ngagai jari nuan.  Isi kami ulih pemaik nuan ti ngelui peragam mensia.  Tulung sereta keringka pengarap kami ti mekang.  Dalam nama Jesus Kristus ti Tuhan enggau pengelepas kami.  Amen.

Tu meh hari ti udah digaga Tuhan

Tu meh hari ti udah digaga TUHAN; aram kitai rami gaga lalu ngelantangka diri ba hari tu.  Masmur 118:24

Aku gaga ati lebuh sida bejaku enggau aku, “Aram kitai mansang ngagai rumah TUHAN.  Masmur 122:1

Nuan udah bejaku ngagai aku, lalu aku mendingka semua leka jaku Nuan. Aku endang enggi Nuan, TUHAN Allah Taala ti Pemadu Bekuasa, lalu leka jaku Nuan ngasuh ati aku gaga sereta lantang.  Jeremiah 15:16

Tang anang semina mendingka jaku nya, lalu nipu diri empu. Kereja utai ti diasuh jaku nya.  James 1:22

Apai kami di serega, terima kasih ke sahari tu, hari ti udah digaga nuan.  Tulung kami ngambika kami selalu ngemesaika sereta ngangkatka nama Nuan ninting hari.  Tulung kami ngambika kami selalu gaga sereta lantang lebuh kami nerima ajar ari jaku Nuan.  Keringka pengarap kami lalu tulung kami mega ngambika kami deka ngereja utai ti diajar ba jaku nuan, lalu ukai semina ninga iya aja.  Dalam nama Anak nuan, Jesus Kristus.  Amen.

Pelan Allah Taala Meri Kitai Pemaik

 Laban Aku nemu pelan Aku ke kita, pelan kena meri kita pemaik ukai kena ngemediska kita, pelan kena meri kita pengidup enggau pengadang ke jemah ila.  Jeremiah 29:11

Nitihka ayat tu, Allah Taala nemu semua utai ti deka dikereja iya ba pengidup kitai.  Semua utai tu ukai utai ti deka ngenusahka kitai, tang utai ti manah, utai ti mai penyamai dalam pengidup kitai.  Lalu kebuah iya deka ngereja semua tu iya nya ngambika kitai bisi pengadang dalam pengidup kitai ke jemah ila.

Kategal nya pengidup kitai patut bisi mai reti. Kitai ngatur pengidup kitai baka orang ti bisi utai manah ti diadang deka nyadi ba kitai.  Kitai enda putus asa.  Kitai arapka pemanah dalam pengidup kitai.  Kitai arap Allah Taala beberatka semua utai ti nyadi ba pengidup kitai. 

Kitai manggai semua pengadang tu ba Allah Taala empu.  Allah Taala tau dikarap laban iya enda bula lalu semua semaya Iya tau dikarap (Penyampau 23:19), Iya penuh pengasih (Titus 3:5), lalu Iya nemu sereta ngelala genap iku kitai (John 10:14). 

Besampi kitai:

Apai kami di serega, terima kasih kategal semaya nuan ke pengidup kami badas magang.  Terima kasih laban Nuan enda bula, enda nemu berubah lalu kami tau arapka semua semaya nuan ke kami.  Iring kami ngambika kami ngayanka pengidup ti bisi pengadang.  Dalam nama Jesus Kristus, Tuhan enggau Pengelepas kami.  Amen.

Allah Taala Deka Nembuka Pengawa Badas Ti Dipunka Iya

 Lalu aku nemu, Allah Taala ke udah ngepunka pengawa ti badas tu ba kita, deka nembuka pengawa nya lebuh Hari Jesus Kristus. Pilipi 1:6

Lebuh kitai nerima Jesus Kristus dalam pengidup kitai, tekala nya kitai bulih pengidup baru (2 Korint 5:17).  Kitai enda agi dituntung dosa ti ngujungka pemati, tang segala ukum dosa kitai udah ditanggung Jesus Kristus ba tubuh Iya empu ba atas kayu regang.

Tang taja kitai udah bulih pengidup baru, ukai reti nya kitai badu agi ngereja utai ti salah tauka pengawa ti jai.  Pengidup kitai deka berubah semak agi baka pengidup Jesus Kristus lebuh kitai nyerah tubuh kitai, ninting hari, ngagai kuasa Roh Kudus.  

Allah Roh Kudus deka bekereja dalam pengidup kitai, ngambika kitai nyadi anembiak ti menyana, ti likun, ti talukka sereta ngasika perintah Iya.  Tu meh pengawa badas ti dipun Allah Taala ba pengidup kitai.  Lalu nitihka ayat ti diperatika kitai sahari tu, Allah Taala deka ngiring kitai sereta nembuka pengawa badas nya lebuh Hari Jesus Kristus.

Nama ti ulih dikereja kitai kena nunjuk kitai amat nembiak Allah Taala?

• Simpan Jaku Iya dalam ati ngambika kitai enda bedosa ngelaban Iya (Masmur 119:11).
• Asuh Tuhan meresa ati kitai ngambika enda ngelalai dosa dalam pengidup kitai (Masmur 139:23).
• Idup baka orang ti amat ngembuan Kristus dalam pengidup kitai (Galatia 2:20).
• Pandangka buah Roh Kudus - pengerindu, pengaga, pemaik, pengeliat ati, penyiru, pemadas, penetap ati, penelap, ulih nagang diri - ba pengidup kitai.

Besampi kitai:

Apai kami di serega, terima kasih kategal pengerindu nuan, kami udah bulih pengidup ti baru dalam Anak nuan.  Iring kami ninting hari ngambika kami ulih ngayanka pengidup ti baru tu ba mua orang mayuh, ngambika kereja badas ti dikereja kami mai mulia ke nama Nuan.  Dalam nama Jesus Kristus, kami besampi.  Amen.

Beri Terima Kasih Dalam Semua Utai

 Beri terima kasih dalam semua utai, laban nya utai ti dikedekaka Allah Taala ari kita dalam Jesus Kristus. 1 Tesalonika 5:18

Dua bengkah utai amat nyata ba ayat tu:

• kitai patut meri terima kasih dalam semua utai
• laban nya ti dikedeka Allah Taala ari kitai

Kati ku kitai ulih ngemeran ati ti selalu beterima kasih dalam semua utai kelebih agi maya kitai benung ngasai penusah, pemedis, tauka pemerinsa?  Sapa kitai mensia berasai gaga lebuh benung merinsa tauka lebuh ngenat pemedis? Dipelaba aku nadai siku kitai!

Tang jaku Allah Taala nyata.  Iya ngasuh kitai meri terima kasih dalam semua utai.  Nya ukai reti iya kitai beterima kasih ke utai ti jai tauka beterima kasih ke utai ti mai pemedis enggau pemerinsa ti nyadi ba kitai.  Utai ti ku ayat ke diperati kitai sahari tu iya nya, enda ngira utai ti nyadi ba kitai - maya lantang tauka maya kitai dituntung pemerinsa - kitai diperansang ngembuan ati ti selalu deka meri kasih.

Nama kebuah kitai patut ngembuan ati ti selalu deka meri terima kasih dalam semua utai?  Laban nya ti dikedeka Allah Taala ari kita.  Kitai enda ibuh ngiga kebuah bukai ti ngasuh kitai meri terima kasih.  Peneka Allah Taala udah chukup nyadi tegal kitai deka meri terima kasih dalam semua utai.

Kati ku kitai matih diri ngambika kitai selalu deka meri terima kasih dalam semua utai?

Keterubah iya, kitai ingatka utai ti udah dikereja Jesus Kristus ke kitai.  Iya udah ngampun dosa kitai sereta meri kitai pengidup ti baru taja kitai orang ti enda patut nerima semua nya ari Iya. Kitai meri terima kasih kategal pengasih iya ke kitai.

Kedua, lebuh kitai meri terima kasih dalam semua utai, kitai ngelengka ati ti rindu mantah.  Jaku bantah enggau jaku ti meri terima kasih enda ulih sama-sama pansut ari mulut kitai!

Ketiga, ati ti deka meri terima kasih nya pengawa ti dipilih kitai.  Kitai milih, ulih tulung kuasa Roh Kudus ti diau dalam kitai, tebiat enggau ati ti selalu deka meri terima kasih.  Kitai ngelengka ati ti selalu deka mantah, ti selalu ngiga penyalah lalu milih ati ti penuh enggau terima kasih laban kitai nemu nya utai ti ngerinduka enggau dikedeka Allah Taala ari kitai.

Penudi iya, lebuh kitai meri terima kasih dalam semua utai, kitai ngaku Allah Taala agi bekuasa, agi tau dikarap, agi baka selama lalu enda berubah.  Kitai ngaku semua utai ti nyadi ba kitai - baik lantang baik pedis - nadai utai enda ditemu iya.

Besampi kitai:

Apai kami di serega, terima kasih ulih pengasih nuan kami udah bulih pengampun enggau pengidup baru.  Terima kasih laban lebuh kami agi dalam pengidup ti ngujungka pemati, nuan udah ngangau kami ke nuan empu.  Tulung kami sereta keringka pengarap kami ngambika kami selalu ingatka semua berekat ti udah diterima kami ari nuan.  Ajar kami ngambika kami ngembuan ati ti selalu deka meri terima kasih dalam semua utai, ukai semina maya lantang tang dalam maya kami ngasaika penusah mega.  Terima kasih laban nuan meruan enggau kami lalu nemu semua utai ti nyadi ba kami.  Dalam nama Jesus Kristus, kami besampi.  Amen.

Semina Dalam Nama Jesus Aja

 Pengelepas semina ditemu dalam orang siku aja, laban nadai nama bukai di baruh langit ti diberi ngagai mensia ti ulih nyelamatka kitai. Surat Pasal Kereja Rasul 4:12

Enti kitai nanya sebarang orang, kelebih agi orang ke ukai bepengarap Kristian, sida deka madah jalai nujuka serega nya lebih ari siti.  Tang ba kitai ti arapka Jesus nitihka ayat ti benung diperatika kitai sahari tu, nadai jalai bukai ti ulih nyelamatka kitai - reti nya tadi semina Jesus aja - ukai Muhammad, ukai Buddha, ukai Krishna, ukai Bahaullah, tauka sebarang petara ti disembah mensia -  ti ulih mai kitai nujuka serega.  Semina Jesus aja ti ulih ngelepaska kitai ari ukum Allah Taala kategal dosa kitai.

Ku Jesus bejaku ba John 14:6, "Aku tu meh jalai, pemendar, enggau pengidup.  Nadai orang ulih datai ngagai Apai enti enda nengah Aku."  Jaku Jesus tu nyemetak amat.  Iya ukai semina nunjukka jalai ngagai Allah Apai tang Iya ti jalai, Iya ti pemendar, Iya ti pengidup.

Barangsapa ti enda ulih tauka enggai nerima Jesus nya Tuhan enggau Pengelepas, nadai ku enggau meh.  Lama laun, nemuka enggau ati ti arap tauka enggau ati ti nulak Jesus, "lebuh nama Jesus disebut, semua utai di serega, di dunya enggau dunya ti di baruh, besugang magang, lalu semua dilah deka ngaku Jesus nya Tuhan, ke mulai Allah Taala ti Apai."  Pilipi 2:10-11

Nya alai, barangsapa ti apin nerima sereta arapka Jesus Kristus nya Tuhan enggau Pengelepas, diatu meh maya nuan nerima sereta ngaku Jesus nya jalai, pemendar enggau pengidup.  Anang nganti maya nuan betunga enggau Jesus dudi ila, alai dilah nuan enda ulih enda ngaku sereta nyebut nama Jesus sereta besugang nyembah Iya.

Besampi kitai:

Tuhan Jesus, kami ngaku nama nuan aja ti pemadu tinggi, nama nuan aja ti patut diangkat, disembah enggau dipuji.  Terima kasih laban nuan udah ngampun kami ari dosa kami sereta udah meri kami pengidup ti baru.  Tulung kami, ulih Roh Kudus nuan, ngambika semua ulah enggau jaku kami ngemesaika nama nuan.  Amen.

Buai Semua Tebiat Jai

 Buai semua dengki, tebiat ngeransi, pengeringat, jaku laya, tebiat bejakuka orang, enggau semua ati ti begedi.  Epesus 4:31

Jaku ti ngasuh kitai muai semua tebiat jai tu dituju ngagai semua kitai ti udah bulih pengelepas ari Jesus Kristus.  Kati ku kitai ti udah bulih pengidup baru dalam Kristus, agi ngembuan semua tebiat ti dikereja kitai ba pengidup lama?

Taja kitai udah nerima pengidup baru dalam Kristus, ukai reti iya tekala nya kitai lalu nyadi mensia ti chukup likun, ti badu agi ngereja utai ti jai.  Semina siti aja utai ti amat udah berubah tekala nya lebuh kitai arapka Kristus - kitai udah bulih pengidup ti baru lalu nadai agi dituntung ukum enggau pengeransi Allah Taala (John 5:24; 1John 5:11-12).  Kitai udah nerima pengampun ti penuh ari Allah Taala laban Jesus Kristus udah nerima ukum ti patut diterima kitai ba tubuh Iya.

Nya kebuah kitai diperansang, diansak ngabas ati diri ninting hari, ngaku dosa kitai sereta minta ampun ari Allah Taala kategal jaku, runding tauka pengawa ti ditemu kitai ngelaban peneka enggau perintah Iya.  Allah Taala udah besemaya, enti kitai ngaku dosa kitai, Iya deka ngampun kitai ari semua dosa kitai, lalu nuchi kitai ari semua penyai (1 John 1:9).

Buai semua tebiat jai ti ba ayat diperatika kitai sahari tu, "lalu nelap enggau pangan diri, siru enggau pangan diri, ngampun pangan diri, baka Allah Taala, dalam Kristus, ke udah ngampun kita." (Epesus 4:32)

Besampi kitai:

Apai kami ti pemadu kasih, ampun kami kategal ati kami ti agi deka ngereja utai ti patut dilengka kami.  Abas ati kami ngambika kami ngaku enggau nadai belalai semua dosa ti udah dikereja kami.  Terima kasih ke semaya nuan  ti deka ngampun dosa kami sereta nuchi kami ari semua dosa.  Keringka pengarap kami awakka kami selalu bepanggai ba nuan, ngambika pengidup kami berubah nitihka peneka nuan. Intu kami ari semua penyai, lalu berkat kami ulih kuasa Roh Kudus nuan.  Dalam nama Jesus Kristus ti pengelepas kami, kami besampi.  Amen.

Pengerindu Allah Taala

 Laban aku nemu, nadai utai, nemuka pemati, tauka pengidup, tauka melikat, tauka bala pemerintah, tauka utai ti diatu, tauka utai ti jemah ila, tauka kuasa, tauka dunya ti di atas enggau dunya ti di baruh, tauka semua utai bukai ti udah digaga Allah Taala, ulih nyeraraka kitai ari pengerindu Allah Taala dalam Jesus Kristus Tuhan kitai.  Rome 8:38-39

Ayat dua iti tu enggau terang madah nadai utai ulih nyeraraka kitai ari pengerindu Allah Taala. Nadai siti ari utai ke udah disebut ba ayat dua iti nya ulih nyerara kitai ari pengerindu Iya.  Nyema kitai terundingka sekeda utai ke nadai disebut ditu, enda kira nama utai nya, utai nya enda meh ulih nyerara kitai ari pengerindu Allah Taala.

Naka meh pemesai pengerindu Allah Taala ke kitai!

Nama kebuah nadai utai ulih nyeraraka kitai ari pengerindu Allah Taala?

• Laban Allah Taala endang pengerindu (1 John 4:8).  Allah Taala ukai semina ngayanka pengerindu iya dalam kaul iya enggau kitai tang  Allah Taala empu ti pengerindu -  pengerindu ti chukup, ti pemadu menyana, ti pemadu likun.
• Laban enti pengerindu meruan dalam kitai, kitai meruan dalam Allah Taala, lalu Allah Taala meruan dalam kitai (1 John 4:16).
• Laban pengerindu enggau pengasih Tuhan enda nemu abis, nyadi baru belama genap pagi (Sabak Kenang 3:22-23).

Laban Allah Taala endang pengerindu, laban Iya udah dulu rinduka kitai lalu udah ngasuh anak Iya Jesus mati kategal dosa kitai, kitai ti udah nyadi anak iya enda tau enda mega ngayanka pengerindu dalam pengidup kitai.  Enti kitai madahka diri rinduka Allah Taala tang begedika menyadi kitai, kitai bula laban enti kitai enda rinduka menyadi kitai ti dipeda, kitai enda ulih rinduka Allah Taala ti enda dipeda (1 John 4:20).

Kati ku kitai ulih mandang kitai sigi ngembuan pengerindu dalam pengidup kitai?  Peratika 1Korint 13:4-7, ti tau nyadi ukur kena kitai ngabas ati diri, enti pengidup kitai amat bisi ngembuan pengerindu.

Pengerindu nya liat ati, nelap, enda kepapas, enda temegah tauka sumbung, tauka jai jaku enggau orang. Pengerindu enda berundingka diri empu, enda jampat ringat tauka bedendam. Pengerindu enda gaga ati ke penyalah, tang gaga ati ke utai ti bendar. Pengerindu natka semua utai, arapka semua utai, ngadang semua utai, tan dalam semua utai.

Kati ku kitai tau berengkah matih diri ngembuan semua ke disebut dia? Kitai enda tau enda belajar sereta belematika jaku Tuhan, lalu nitih sereta ngasika ajar dia ke kitai, laban Jaku Tuhan ngundan pengidup.  Besampi ngambika kitai ukai semina ninga jaku Tuhan aja tang ngereja ajar ti udah didinga.

Besampi kitai:

Apai kami di serega, kami ngangkat nama nuan, kami muji nama nuan laban semina nuan aja ti patut nerima sembah enggau puji ari kami.  Terima kasih ke pengerindu nuan ti enda nemu abis, ti baru genap hari, ti diberi nuan ngagai tiap iku orang ti arapka nuan.  Tulung kami, ulih Roh Kudus nuan, ngambika kami seruran belematika sereta ngasika jaku nuan, ngambika kami ngemeran sereta nunjuka pengerindu nuan dalam pengidup kami, ngambika kami diubah nyadi sebaka gamal enggau nuan, enggau mulia ti nambah-menambah.  Dalam nama Jesus Kristus ti Tuhan enggau pengelepas kami.  Amen.

Beridup ba genap leka jaku Allah Taala

Tang ku Jesus nyaut, "Endang udah ditulis,  'Mensia enda ulih idup makai roti aja, tang beridup ba genap leka jaku ti pansut ari mulut Allah Taala.'"  Matthew 4:4

Jesus mansutka jaku ke diperati kitai sehari tu lebuh iya diuji Sitan udah bekau iya bepasa empat puluh hari enggau empat puluh malam di menua puang.  Sitan, meda Jesus nya berasai lapar, lalu nguji Iya ngena jaku munyi tu, "Enti Nuan amat Anak Allah Taala, asuh batu tu nyadi roti."

Udah tentu Jesus tau sereta ulih ngaga batu nya nyadi roti laban iya endang amat Tuhan Allah.  Jesus enda ibuh meri bukti tauka mandangka diri Iya amat anak Allah Taala ngagai Sitan.  Sitan empu tentu nemu sapa Jesus ke bendar tang iya enggai enda nguji Jesus, nguji enti Jesus deka nyaut peminta tubuh iya ti benung aus enggau lapar.

Nama kebuah Sitan nguji Jesus ngena pemakai? 

Kitai mensia sigi enda ulih idup enti kitai enda makai.  Lebuh Allah Anak nyadi mensia iya ngasaika semua utai ti diasai kitai mensia, Taja pia, iya agi Tuhan.  Ari utai ti dikena Sitan nguji Jesus, kitai nemu iya ngumbai Jesus nya lemik baka mensia bukai.  Tang Jesus ngalahka penguji ari Sitan ngena jaku ari Bup Kudus, jaku ti diambi ari Ulang Adat 8:3. 

Kati ku kitai ulih mandangka kitai tu amat beberatka jaku Allah Taala dalam pengidup kitai, ngambika kitai baka Jesus ulih ngalahka penguji ari Sitan?

• Simpan adat Tuhan dalam ati kitai ngambika kitai enda bedosa ngelaban Tuhan. Masmur 119:11
• Gaga jaku Tuhan nyadika lampu tenggau ba pengidup kitai.  Masmur 119:105
• Ngasika jaku Tuhan laban iya ulih ngajar, ngerara, ngaduka utai ti salah, sereta matihka kitai dalam pengidup ti lurus.  2 Timoti 3:16

Besampi kitai:

Apai kami di serega, ampun kami laban kami sigi nembiak ti lemik sereta mudah alah laban penguji.  Keringka pengarap kami ngambika kami ngasika ajar nuan.  Tulung kami, ulih Roh Kudus nuan, ngambika kami enda limpang ari beratika sereta belajarka jaku nuan ninting hari.  Dalam nama Anak nuan Jesus Kristus ti Tuhan enggau pengelepas kami.  Amen.